อถ เถโร สารีปุตฺโต วจีวิปฺผาเรเนว เม อิทํ เภสชฺชํ อุปฺปนฺนํ มา เน อาชีโว
ภิชฺชีติ อาชีวเภทนภยา ตํ เภสชฺชํ ปชหิ น อุปชีวิ ฯ ตาย จ วิญฺญาตํ อริยา
น ปริภุญฺชนฺติ ฯ โส จ ปุคฺคโล อริยานํ สมเย โอญาโต โหติ หีฬิโต ขีฬิโต ครหิโต
ปริภูโต อจิตฺติกโต ภนฺนาชีโวเตฺวว สํขฺยํ คจฺฉติ ฯ กตมา อนวชฺชา วจีวิญฺญตฺตี ฯ
อิธ มหาราช ภิกฺขุ สติ ปจฺจเย เภสชฺชํ วิญฺญาเปติ ญาติปวาริเตสุ ปุคฺคเลสุ โส โรคเภสชฺชํ
อภิหรติ อยํ วจี วิญฺญตฺติ อนวชฺชา ฯ ตายปิ วิญฺญาปิตํ อริยา อุปชีวนฺติ ฯ โส
จ ปุคฺคโล อริยานํ สมเย วณฺณิโต โหติ โถมิโต ปสตฺโถ ปริสุทฺธาชีโวเตฺวว สํขิยํ คจฺฉติ
อนุมโต คถาคเตหิ ฯ ยํ ปน มหาราช ภควตา กสิภารทฺวาชสฺส พฺราหฺมณสฺส โภชนํ
ชหิตํ ตํ อาเวฏฺฐนนิเวตฺถนนิกทฺทนนิคฺคหปฏิกมฺเมน นิพฺพตฺตํ ตสฺมา ตํ ปิณฺฑปาตํ ตถาคโต
ปฏิกฺขิปิ น อุปชีวิ ตํ ปชหีติ ฯ
สพฺพกาลํ ภนฺเต นาคเสน ตถาคเต ภุญฺชมาเน เทวตา ทิพฺพโอชํ อากิรนฺติ
อุทาหุ ทฺวีสุเยว ปิณฺฑปาเตสุ สูกรมทฺทเว จ มธุปายาเส จ อากิรนฺตีติ ฯ สพฺพกาลํ
มหาราช ตถาคเต ภุญฺชมาเน เทวตา ทิพฺพโอชํ คเหตฺวา อุปติฏฺฐิตฺวา อุทฺธเต อุทฺธเต
อาโลเป ทิพฺพโอชํ อากิรนฺติ ฯ ยถา มหาราช รญฺโญ สูทา รญฺเญ ภุญฺชมาเน สูเปยฺยํ
คเหตฺวา อุปติฏฺฐิตฺวา กวเล สูเปยฺยํ อากิรนฺติ เอวเมว โข มหาราช สพฺพกาลํ ตถาคเต
ภุญฺชมาเน เทวตา ทิพฺพโอชํ คเหตฺวา อุปติฏฺฐิตฺวา อุทฺธเต อุทฺธเต อาโลเป ทิพฺพโอชํ
อากิรนฺติ ฯ เวรญฺชายํ มหาราช ตถาคเต สุกฺกยวปุลเก ภุญฺชมาเน เทวตา ทิพฺเพน
โอเชน เตมยิตฺวา เตมยิตฺวา อุปหรึสุ ฯ เตน ตถาคตสฺส กาโย อุปฏฺฐิโต
อโหสีติ ฯ ลาภา วต ภนฺเต นาคเสน ตาสํ เทวตานํ ยา ตถาคตสฺส สรีเร
ปฏิชคฺคนาย สตตํ สมิตํ อุสฺสุกฺกํ อาปนฺนา ฯ สาธุ ภนฺเต นาคเสน เอวเมตํ ตถา
สมฺปฏิจฺฉามีติ ฯ

คาถาภิคีติโภชนทานกถาย กถเน ปญฺโห สตฺตโม ฯ

ภนฺเต นาคเสน ตุมฺเห ภณถ ตถาคเตน จตูหิ อสงฺเขยฺเยหิ กปฺปานํ
กปฺปสตสหสฺเสน จ เอตฺถนฺตเร สพฺพญฺญุตญาณํ ปริจาริตํ มหโต ชนกายสฺส
อุทฺธณายาติ ฯ ปุน จ สพฺพญฺญุตํ ปตฺตสฺส อปฺโปสฺสุกฺกตฺตาย จิตฺตํ นมติ โน
ธมฺมเทสนายาติ ฯ ยถา นาม ภนฺเต นาคเสน อิสฺสฏฺโฐ วา อิสฺสฏฺฐสิสฺโส วา พหุเก
ทิวเส สงฺคามตฺถาย อุปาสนํ สิกฺขิตฺวา สมฺปตฺเต มหายุทฺเธ โอสกฺเกยฺย เอวเมว โข